Шиаоёу, Хятад

Миний нэрийг Шиаоёу гэдэг, би 26 настай. Анх би Католик шашинтай байсан юм. Бага байхдаа Мөргөлд оролцож, Библи уншиж, нүглээ улайн, ариун зоог хүлээн авахаар ээжтэйгээ хамт сүмд явдаг байлаа. Миний ээж итгэлдээ маш махруу зүтгэлтэй байв. Тэрээр гэрийнхээ хоол хүнс, янз бүрийн бусад зүйлсийг чуулгандаа хандивлаж, мөн мөнгө хандивладаг байсан юм. Чуулганы удирдагч, гэлэнмаа нарт ээж маш их таалагддаг байв. Ээжийг харахаараа тэд инээмсэглэн мэндэлж, маш их анхаарал хандуулж, бас ээж рүү байн байн утсаар ярьж, сүмийн бүхий л төрлийн үйл ажиллагаанд оролцон, янз бүрийн үүрэг даалгавар гүйцэтгэхэд туслахыг хүсдэг байлаа. Би ч бас гэлэнмаа нарын заадаг хичээлд идэвхтэй оролцдог байсан бөгөөд сүмийн гишүүдтэйгээ хамт Библи уншдаг байв. Тэр үед би, Эзэнийг дэргэдээ байлгаснаас ирдэг баяр хөөр, амар тайвныг мэдэрч, өдөр бүр аз жаргалтай байдаг байлаа. Хэдий тийм боловч цаг хугацаа өнгөрөхийн хэрээр сүмийн гишүүдийн маань итгэл улам бүр хөрч байв. Миний сүнс ч бас сул дорой болж, Эзэний сургаалуудыг мөрдөх чадваргүй боллоо. Би байн байн нүгэл үйлдэж, дараа нь нүглээ улайдаг байсан бөгөөд гэрлэснийхээ дараа нөхөртэйгээ хамт ажиллахаар улсынхаа өөр хэсэг рүү нүүв.

Нүд ирмэхийн зуурт 2013 оны Зул сарын баяр болж, Төгс Хүчит Бурханы Чуулганы нэг эгчтэй уулзах завшаан надад тохиосон юм. Эгч надад Эзэн Есүс аль хэдийнэ эргэж ирсэн, тэгээд Өөрийн ажлын шинэ үе шатыг гүйцэтгэж байгаа гэж хэлэв. Үүнийг сонсоод би гайхаж, сэтгэл хөдлөн: “Тийм үү? Эзэн эргээд ирчихэж! Эзэн хэзээ эргэж ирсэн юм бэ? Эзэн яг одоо хаана байгаа юм бэ? Эгч ээ, надад хэлээч” гэлээ. Эгч надтай нөхөрлөж, “Төгс Хүчит Бурхан бол эргэн ирсэн Эзэн Есүс юм. Төгс Хүчит Бурхан хэдэн сая үг илэрхийлсэн бөгөөд эцсийн өдрүүд дэх шүүлтийн ажлаа хийж байгаа. Тэрээр хүн төрөлхтнийг аврахын тулд Бурханы гүйцэтгэдэг ажлын гурван үе шат, бие махбодтой болохын нууц, Библийн нууц, Бурханы нэрийн утга учир, хүн төрөлхтний төгсгөл, хүрэх газар зэргийг оролцуулаад хүнийг ариусгаж, аврах бүх үнэнийг илчилсэн. Энэ нь Эзэн Есүсийн: ‘Та нарт хэлэх зүйл Надад олон байгаа боловч та нар одоо тэдгээрийг дааж чадахгүй. Гэхдээ үнэний Сүнс болох Тэр ирэх үедээ та нарыг бүх үнэн рүү удирдана: Учир нь Тэр Өөрийн санаагаар ярихгүй; харин сонссон зүйлээ Тэр ярих болно: Мөн Тэр ирэх зүйлсийг та нарт харуулна’ (Иохан 16:12–13) хэмээх үгийг биелүүлдэг” гэж хэлэв. Би эгчийн нөхөрлөлийг чин сэтгэлээсээ сонсож, “Эзэний эргэн ирэлтийг угтан авч чадах юм гэж би хэзээ ч бодож байсангүй. Энэ ч гайхмаар байна шүү” гэж бодлоо. Дараа нь эгч надад Бурханы ажлын гурван үе шат болон Бурханы нэрсийн утга учрын талаар гэрчлэл хийв. Намайг ойлгохгүй байж магад гэж айсандаа эгч зүйрлэл, жишээ ярьж өгөв. Тэрээр тодорхой, илэрхий байдлаар нарийвчлан дэлгэрэнгүй нөхөрлөсөн юм. Түүний нөхөрлөлөөр дамжуулан би урьд нь ойлгоогүй байсан олон үнэнийг ойлгож авав. Түүнчлэн хүнийг шүүж, гэсгээж, цэвэрлэж, төгс болгох ажлыг гүйцэтгэхээр Эзэн эргэн ирснийг мэдсэн юм. Төгс Хүчит Бурхан бол үнэхээр эргэн ирсэн Эзэн Есүс байх тун боломжтой гэж надад санагдсан бөгөөд би эцсийн өдрүүд дэх Бурханы ажлыг судлах хүсэлтэй байгаагаа эгчид хэллээ. Дараа нь би ах, эгч нартай хамт цуглаанд оролцож, Бурханы үгийг уншиж, Бурханыг магтсан магтан дуу дуулж, бүжиглэдэг байв. Бурханы үгийг унших зуур ойлгохгүй зүйлс тулгарах бүрд ах, эгч нар тэр талаар маш тэвчээртэй нөхөрлөдөг байлаа. Тэдний нөхөрлөлд Ариун Сүнсний гэгээрэл, гэрэлтүүлэлт байсан бөгөөд тэдэнтэй хамт цуглаанд оролцох нь Ариун Сүнсний ажлын таашаалыг дахин нэгэнтээ эдлэх боломжийг надад олгосон юм. Би туйлын их аз жаргалтай байлаа. Төгс Хүчит Бурханы энэ том гэр бүлд дээд доод, баян ядуугийн зааг ялгаа байсангүй. Ах эгч нар бүгд бие биетэйгээ нээлттэй байж, үргэлж сэтгэлээ уудалдаг байлаа. Энэ бол үнэхээр аз жаргалтай амьдрал мөн гэж надад санагдав! Нэг сар гаруй хугацаанд судалсны дараа би Бурханы олон үгийг уншсан ба Төгс Хүчит Бурхан бол эргэн ирсэн Эзэн Есүс мөн гэдэгт итгэх боллоо. Би их хувьтай хүн мэт надад санагдахын зэрэгцээ энэ сайн мэдээг ээждээ болон сүмийн гишүүддээ хэлэхийг хүсэв.

Хятадын цагаан сарын үеэр нөхөр бид хоёр төрсөн нутагтаа очлоо. Гэртээ харьж ирээд би ээждээ Төгс Хүчит Бурханы эцсийн өдрүүдийн ажлын талаар нэн даруй гэрчлэл хийсэн боловч намайг юу ч гэж хэлсэн бай, ээж маань үүнийг хүлээж авахаас татгалзав. Миний урам жаахан хугарч, нэлээн их балмагдлаа. “Төгс Хүчит Бурхан бол эргэн ирсэн Эзэн Есүс гэдэг нь тодорхой. Ээж үүнийг яагаад хүлээн зөвшөөрч чаддаггүй байна аа?” гэж би бодов. Ээж маань хүлээн авахгүй байгааг хараад би энэ асуудлыг орхихоос өөр аргагүй болсон юм. Төрсөн нутагтаа очих аялал маань дууссаны дараа би ажиллаж байсан газар луугаа буцав. Би ах, эгч нартай хамт цуглаанд оролцож, чуулгандаа үүрэг гүйцэтгэж байлаа. Тэр үед сүнс минь таашаалаар бялхаж, амьдрал минь харьцуулшгүй аз жаргал, баяр хөөрөөр дүүрч байсан юм. Иов шалгалтаар бүх эзэмшлээ, хөвгүүд, охидоо алдаж, түүний бие яр хатгинд бүрхэгдсэн атал тэрээр Бурханы нэрийг магтаж, Бурханд жинхэнэ итгэлтэй байж чадсан тухай би Бурханы үгээс уншлаа. Мөн цорын ганц хүү Исаакаа тахил болгож, Бурханд эргүүлэн өгч чадсан Абрахам бас байв. Эдгээр зүйлийн тухай унших үед ялангуяа тэдний итгэл, Бурханд дуулгавартай байдал сэтгэлийг минь хөдөлгөж, би ч бас ийм хүн байхыг хүслээ.

Яг Бурханы хайранд умбан байх үед миний амьдрал гэнэт хар дарсан зүүд болж хувирав. 2014 оны 8 дугаар сарын нэгэн өдөр ээж гэнэтхэн над руу утсаар ярьж, охин маань хүнд өвчтэй байгааг хэллээ. Үүнийг сонсоод би сандарч цочирдлоо. “Охин маань тийм жаахан; тэр яаж тийм хүнд өвчтэй байж болох юм бэ?” гэж би бодов. Охиныхоо төлөө би маш их санаа зовж, үнэхээр аймшигтай санагдаж байлаа. Тэгээд би Бурханы өмнө очиж: “Өө Бурхан минь, Таны зөвшөөрлөөр ийм нөхцөл байдал надад тулгарлаа. Миний охины өвчин Таны гарт байгаа. Би охиноо Танд даатгахыг хүсэж байна. Надад жинхэнэ итгэл өгөөч” хэмээн залбирав. Залбирсны дараа би бага зэрэг тайвширлаа. Тэгээд нөхөр бид хоёр яаравчлан төрсөн нутаг дахь гэртээ харив. Биднийг гэртээ очиход охин маань орондоо маш тайван унтаж байсан нь миний гайхшийг төрүүллээ. Би охиноо сэрээхийг хүссэн боловч ээж гараараа дохин намайг болиулж, “Битгий сэрээ. Тэр зүгээр!” гэж ширүүн хэлсэн юм. Тэр үед л би олон хамаатан маань манайд цугласан байхыг анзаарсан бөгөөд Төгс Хүчит Бурханд итгэхийг минь болиулах гэсэндээ гэртээ хурдан ирүүлэхийн тулд ээж намайг хуурсан болохыг ухаарлаа. “Бурхан өнөөдөр надад зориулж энэ нөхцөл байдлыг зохицуулсан. Энэ бол миний туулах ёстой зүйл байж таарна” гэж би бодов. Тэгээд би ээжээсээ: “Ээж ээ, охин маань зүгээр байна. Та яагаад намайг хуурч ирүүлсэн юм бэ?” гэж асуулаа. Намайг ярьж дуусахаас өмнө ээж уурлан хашхирч: “Би сүм рүү явж, тахилч нар болон чуулганы удирдагчдаас асуусан. Зүүний Аянга аюултай, бас тэдэнтэй нэгдмэгцээ чи дахин хэзээ ч тэднийг орхин явж чадахгүй гэж тэд хэлсэн. Цаашид битгий итгэ. Би чиний сайн сайхны төлөө л ингэж байна. Чамайг буруу замд орсон байх гэж би айж байна” гэлээ. Ээж маань бас Төгс Хүчит Бурханы Чуулганы эсрэг шашны ертөнцийн зохиосон худал үг, гүтгэлгийг давтан хэлсэн юм. Ээжийнхээ хэлэхийг сонсоод би ингэж бодлоо: “Миний итгэл огтхон ч буруу биш. Харин ч эсрэгээрээ, би Бурханы шинэ ажилтай хөл нийлүүлж байна. Миний итгэдэг Төгс Хүчит Бурхан бол өнөө үед хүнийг шүүх, гэсгээх, цэвэрлэх ажлыг хийж байгаа эргэн ирсэн Эзэн Есүс юм. Энэ бол үнэн зам гэдэгт би туйлын итгэлтэй байна, тэгэхээр би яагаад үүнээс татгалзана гэж? Тахилчид болон чуулганы удирдагчид: ‘Хэрвээ Зүүний Аянгад итгэж, чуулганд нь нэгдэх юм бол хэзээ ч гарч чадахгүй’ гэж хэлж байгаа нь хүмүүсийг мэхлэхийн тулд зохиосон цэвэр цуу яриа, төөрөгдөл юм. Би Төгс Хүчит Бурханы Чуулганы цуглаануудад оролцоод хагас жил илүү хугацаа өнгөрч байна. Энэ талаар би хүмүүс та нараас илүү ихийг мэднэ. Төгс Хүчит Бурханы Чуулганы үүд хаалга үргэлж нээлттэй байдаг ба хүмүүс чөлөөтэй явж болно. Энэ нь тахилч, чуулганы удирдагчдын хэлдэгтэй огт адилгүй. Ах, эгч нар бүгд Бурханы үгийг уншсанаар үнэн замыг мэдэж авсан ба амийн хангалт хүртэж, амийн усны булгийг олсон. Ийм учраас тэд чуулганыг орхиж явахыг хүсдэггүй. Төгс Хүчит Бурханы үгийг уншаад бидний сүнс хангалуун болдог. Хуучны эзгүйрч, хоосорсон сүм рүү эргэн очихыг хэн хүсэх билээ дээ? Тахилч, чуулганы удирдагч нар Төгс Хүчит Бурханы эцсийн өдрүүдийн ажлыг огт судлаагүй. Тэд Төгс Хүчит Бурханы үгийг уншаагүй, түүнчлэн Төгс Хүчит Бурханы Чуулганы цуглаанд оролцоогүй. Тэд юунд суурилан ингэж хэлж байгаа юм бэ? Тэд ор үндэсгүй цуу яриаг санаанаасаа зохиож байгаа бус уу?” Хариу хэлэхгүй байгааг минь хараад ээж уурсан хүрч ирээд, намайг хэдэнтээ алгадан, Бурханаас урвасан зүйл албан хүчээр хэлүүлэх гэж оролдов. Ээжийнхээ ийм байгааг харахад үнэхээр сэтгэл өвдөж байлаа. Хэрвээ тахилч, чуулганы удирдагч нарын зохиосон худал хуурмаг байгаагүй бол ээж маань яавч Төгс Хүчит Бурханд итгэхийг минь болиулахаар хүчлэхгүй байсан гэж бодогдсон юм. Тэгээд би ээждээ “Төгс Хүчит Бурхан бол эргэн ирсэн Эзэн Есүс. Төгс Хүчит Бурханд итгэх нь тэнгэрийн хууль, газрын зарчим. Би Түүнд эцсээ хүртэл итгэх болно!” гэж хэллээ. Ингэж хэлэхийг минь сонсоод ээж уурласандаа минчийн улайж, нүд нь улаанаар эргэлдэв. Тэгээд над руу: “Би чиний ээж. Чи намайг сонсох ёстой!” гэж чангаар хашхичлаа. Ээжийнхээ ийм бодлогогүй байхыг хараад би өөр юу ч хэлэхгүй байхаар шийдэв. Яг тэр үед хамаатнууд маань ч бас намайг нэгэн зэрэг шүүмжилж эхэлсэн бөгөөд намайг Бурханаас урвуулахаар оролдон олон зүйл хэллээ. “Би Эзэн Есүсийг аль хэдийн угтан авсан. Миний итгэдэг Бурхан жинхэнэ, миний алхдаг зам зөв. Би яавч Бурханаас урвахгүй!” гэж би бодов. Би тэдэнд Бурханы эцсийн өдрүүдийн ажлыг судалж, мөн тахилч, чуулганы удирдагч нарын цуу ярианд хууртан Төгс Хүчит Бурханыг сохроор яллаж, эсэргүүцэхгүй бай гэж зөвлөхийг үнэхээр хүссэн юм. Гэвч үнэнийг болон Бурханыг үзэн ядсан хандлагыг нь хараад тэд үнэнийг хүлээн авахгүй гэж надад санагдсан ба би юу ч хэлсэн нэмэргүй байх учраас тэдэнд дахин юу ч хэлсэнгүй. Хэсэг хугацааны дараа ээж болон хамаатнууд маань хамтдаа гарч явцгаалаа. Гэвч ээж маань намайг зүгээр орхисонгүй, харин дүүг манайд амьдруулахаар болов. Дүү маань намайг гэмт хэрэгтэн мэт өдөр бүр ажиглаж, хаашаа ч явсан дагадаг байлаа. Ингээд л миний хувийн эрх чөлөө алдагдсан юм.

Хоёр хоногийн дараа би гэр бүлийнхэнтэйгээ хамт оройн хоолоо идэж байтал ээж маань гэнэт орж ирэв. Ээж маасайтал инээж, дүр эсгэсэн өнгөөр “Шиаоёу, хэн ирснийг хараач!” гэж надад хэлэв. Ээжийн дууны өнгө, илэрхийллээс улбаалан би: “Миний ээжийг ийм ааш зантай байхад хүргэдэг ямар хүн ирсэн юм бол оо. Энэ ч сайн юм биш дээ” гэж гайхахад хүрэв. Яг тэр үед чуулганы удирдагч Лиу, сүмийн гишүүн Ван орж ирлээ. Би тэдэнтэй тайвнаар мэндэлж, суухыг урив. Биднийг хоолоо идэж дууссаны дараа чуулганы удирдагч Лиу над руу харж инээмсэглээд, “Шиаоёу! Шулуухан ярилцацгаая. Ээжийн чинь хэлснээр бол чи одоо Зүүний Аянгад итгэдэг юм байна. Үүнд итгэхээ боль гэж би чамд хэлэх ёстой. Танай гэр бүлийнхэн олон үеэрээ Католик шашинтай байсан. Чи Эзэнийг орхиж болохгүй, эс бөгөөс Тэр чамайг орхино. Өнөөдөр бид чамд зөвлөгөө өгөхөөр ирлээ, гэхдээ чи биднийг сонсохгүй бол цаг нь ирээд, тамд унах үедээ биднийг буруутгаж болохгүй шүү. Шиаоёу, бид чиний сайн сайхны төлөө л ингэж байна. Нөхрийнхөө өвчнийг бодоод үз. Хэрвээ чиний ээж бид хоёр өдөр бүр Эзэнд залбираагүй бол нөхрийн чинь бие сайжрахгүй байх байсан. Хэрвээ чи Зүүний Аянгад үргэлжлүүлэн итгээд, нөхрийн чинь өвчин дахих юм бол хэн ч туслахгүй” гэж хэллээ. Түүний ингэж хэлэхийг сонсоод зүрх маань дэлсэж, би өөрийн эрхгүй бага зэрэг айв. Тэгээд би: “Нөхөр маань маш их өвдөж, бид их мөнгө зарцуулсан боловч тэр сайжраагүй. Эцэст нь бид өдөр бүр залбирсны хүчээр л түүний биеийн байдал сайжирсан. Хэрвээ юмс үнэхээр тэдний хэлснээр болж, нөхрийн маань өвчин дахивал би яах вэ?” гэж бодлоо. Тэдний заль мэхэнд автаж эхэлж байтал “Төгс Хүчит Бурхан бол хэмжээлшгүй чадалтай эмч билээ!” (Үг. I Боть: Бурханы илрэлт ба ажил. Христийн эхэн үеийн айлдварууд, 6-р бүлэг) хэмээх Бурханы үгийн мөр санаанд орлоо. Энэ тухай бодоод би гэнэт сэрж, ухаан санаа цэлмэв. “Тийм шүү. Би эргэн ирсэн Эзэн болох Төгс Хүчит Бурханд итгэдэг. Миний нөхөр дахин өвдөх эсэх нь Бурханы гарт байгаа; энэ нь тэднээс хамаарахгүй. Бурхан бүхнийг захирдаг. Надад айгаад байх юм юу байна аа? Ямартай ч тэд биш, Эзэн л миний нөхрийг эмчилсэн. Намайг сүрдүүлж Бурханаас урвуулах гэсэндээ нөхрийн маань өвчнийг ашиглаж, бас гэр бүлд маань бэрхшээл тохиолдохоос айсандаа Бурханыг үгүйсгэж, урвахад намайг хүргэхээр оролдоно гэж би хэзээ ч төсөөлсөнгүй. Тэд ямар өөдгүй юм бэ!” гэж би бодлоо. Хорлонтой сэдлийг нь нэвт хараад би тэднийг жигшиж, тэдэнтэй цаашид ярихыг хүссэнгүй.

Дуугүй байгааг минь хараад чуулганы удирдагч Лиу ёжтойгоор: “Чи их шаргуу байх шиг байна! Бид чамд зөндөө хэллээ, тэгэхээр чи юу бодож байгаагаа бидэнд хэл дээ!” гэв. Тэд дөнгөж сая нөхрийн маань өвчний талаар ярьснаас хойш надад жаахан эвгүй байлаа. Гэвч Бурхан бүхнийг захирдаг тухай бодох үедээ би гэнэт өөртөө итгэлтэй болов. Юу ч тохиолдсон бай хамаагүй, би Бурханаас урвахгүй. Би зоригоо чангалан тэдэнд ийн хэллээ: “Би Төгс Хүчит Бурханд бат итгэдэг гэдгээ та бүхэнд хэлье! Бурханд итгэх итгэлээсээ би татгалзахгүй!” Намайг сонсоод ээж маань: “Явцгаая! Сүм рүү явж залбиръя” гэж бархирав. Түүнийг ингэж хэлэхэд бүгд уурлан гарч одлоо. Тэдний догшин ширүүн төрхийг хараад би өөрийн эрхгүй бага зэрэг айв. “Тэд залбирах гэж байна. Арай намайг хараах юм биш биз? Би яах вэ?” гэж бодогдлоо. Ийнхүү яах ч аргагүй байдалд орсон би Бурханы өмнө очиж, “Өө Төгс Хүчит Бурхан минь! Тэд бүгд миний эсрэг тулалдахаар зогсоод намайг бүсэлж байна! Надад ганцаархнаа байгаа мэт санагдаж байна. Өө Бурхан минь! Би юу хийхээ мэдэхгүй байна. Маш их айж байна. Намайг залж чиглүүлээч!” хэмээн залбирлаа. Залбирч дуусаад би Бурханы зарим үгийг саналаа: “Чамайг хүрээлэн буй орчны бүх зүйл Миний зөвшөөрлөөр оршдог, Би бүгдийг нь төлөвлөдөг гэдгийг чи мэднэ. Тодорхой харж, Миний чамд өгсөн орчинд Миний зүрх сэтгэлийг хангалуун байлга. Бүү ай, олон түмний Төгс Хүчит Бурхан чамтай гарцаагүй хамт байна; Тэр та нарын ард зогсдог, Тэр та нарын бамбай билээ” (Үг. I Боть: Бурханы илрэлт ба ажил. Христийн эхэн үеийн айлдварууд, 26-р бүлэг). Бурханы үгийн гэгээрэл, удирдамж дор сэтгэл маань цэлмээд ирэв: “Тийм ээ! Бурхан бол миний баттай түшиг тулгуур. Бурхан миний хажууд байхад айх зүйл юу ч байхгүй. Чуулганы удирдагч болон Ван гэгч хүн намайг тамд очно гэж айлган, гэр бүлд маань бэрхшээл тохиолдож, нөхөр маань өвдөхөөс айлган, улмаар Бурханыг орхиулахын тулд л тэдгээр зүйлийг хэлсэн. Хэрвээ би хулчийж, айх юм бол Сатаны арга залинд автсан гэсэн үг болох бус уу? Нөхөр бид хоёрын хувь заяа, хүрэх газар, зол завшаан, азгүйтэл өөр хэн нэгнээс хамаарахгүй, тахилч болон чуулганы удирдагчдаас бүр ч шалтгаалахгүй. Тэдгээр нь Бурханы гарт байдаг. Тэд намайг яллаж, хараагаад ямар ч нэмэргүй” гэж би бодлоо. Ингэж бодоод би дахин тайвширч, ердөө ч айхгүй байлаа. Үгээрээ намайг удирдаж, Сатаны явуулгыг нэвт харах итгэл, хүч чадал өгснийх нь төлөө би Бурханыг магтаж, Түүнд талархсан ба ингэснээр би ээждээ болон бусад хүмүүст мэхлэгдэж, самуураагүй юм.

Нэг өдрийн үдээс хойш би хүүхэдтэйгээ хамт дуг хийх гэж байтал хуучин чуулганы маань Жао эгч, Жан эгч хоёр ирж намайг үймүүлэв. Жао эгч намайг айлган сүрдүүлэх зүйл хэлж, Жан эгч маш ноцтой царайлан: “Энэ үнэн шүү. Бид урьд нь Төгс Хүчит Бурханы Чуулганы хүмүүстэй холбогдож, тэдэнд хууртах дөхсөн” гэв. Түүний ингэж хэлэхийг сонсоод миний уур хүрлээ. Ах, эгч нар маань хүн хуурахаар оролдож яавч чадахгүй гэдгийг би мэдэж байв. Тэдний хэлж байсан бүхэн ердөө л худал хуурмаг, гүтгэлэг байлаа. Иймд би түүнээс: “Тэд таныг яаж хуурсан юм бэ?” гэж асуув. Жан эгч ноцтой өнгөөр: “Чи мэдэх аргагүй. Тэд надад ном өгсөн!” гэв. Би цааш нь түүнээс: “Надад хэлээч, тэдний өгсөн ном ямаршуу байсан бэ? Номны нэр нь юу юм? Юуны тухай байсан бэ?” гэж асуулаа. Жан эгч сандарсан харагдсан ба хэсэг зуур ээрч, түгдэрч байснаа эцэст нь “Би мартчихжээ” хэмээн асуултаас булзахаар оролдов. Ингэж хэлэхийг нь сонсоод би: “Та нар бол гэлэнмаа! Яаж бусдыг зориуд үндэслэлгүй буруутган худал гэрчлэл хийж зүрхлэв ээ? Та нар яагаад Бурханд ийм хүндэтгэлгүй хандаж байгаа юм бэ? Та нар үнэхээр Бурханд итгэгчид мөн үү? Бурханаар шийтгэгдэхээс айхгүй байна уу?” гэж бодлоо. Дараа нь Жао эгч надаас: “Чи ажилдаа явах гэж байна уу?” гэж дахин асуув. Би “Тийм ээ!” гэж эрс шийдэмгий хариулсан юм. Тэрээр худал тал засаж, надад: “Битгий ажилдаа яв. Гэртээ суугаад хүүхдээ харсан нь хавьгүй дээр!” гэж зөвлөв. Би тэдний хоёр нүүртэй занг маш их үзэн ядсан тул өрөөнөөс гарч явахдаа: “Өөрсдийгөө л хичээ” гэж хэлсэн юм. Надад саад хийх оролдлого нь бүтэлгүйтсэнийг хараад тэд цөхөрсөн байдалтай явж одлоо. Тэднийг явсны дараа би маш их бухимдаж, бачимдав. Чуулганы удирдагчид болон энэ гэлэнмаа нар саяхнаас намайг дарамтлахаар байн байн ирж, нэг бол Төгс Хүчит Бурханыг болон ах эгч нарыг гүтгэж, дайрч давшилж, тэдний талаар цуу яриа тарааж, эсвэл намайг мэхэлж, айлган сүрдүүлэхийн тулд гажууд онол түгээж байгаа тухай би бодов. Хэдийгээр би тэдэнд хуурталгүй, тэдэнтэй маргаж, тэдний хэлснийг няцааж байсан боловч тухай бүрд нь маш их цухалдан, Бурханы өмнө өөрийгөө тайван байлгаж, Бурханы үгийг уншиж чадахгүй байлаа. Дүү маань намайг цаг үргэлж ажигласан хэвээр байв. Би залбирч, магтан дуу дуулж, Бурханы үгийг унших болгондоо маш их хязгаарлагдсан мэт санагдаж, тун их сэтгэлээр унаж байлаа. Зовж шаналсандаа би Бурханд хандан залбирлаа: “Төгс Хүчит Бурхан минь! Чуулганы энэ удирдагч, энэ гэлэнмаа нар надад саад хийх гэж ахин дахин ирлээ. Би маш их бачимдаж, бухимдаж байна. Яг одоо би тэдэнтэй хэрхэн учраа олохоо мэдэхгүй байна. Хүндэт Бурхан минь, намайг гэгээрүүлж, залж чиглүүлээч!”

Залбирсныхаа дараа би MP5 тоглуулагчаа гаргаад Бурханы үгийн энэ хэсгийг харж таарлаа: “Том сүмд Библи уншиж, үүнийг бүхэл өдөржингөө цээжээр уншдаг хүмүүс байдаг атал тэдний дундаас нэг нь ч Бурханы ажлын зорилгыг ойлгодоггүй. Тэдний дундаас нэг нь ч Бурханыг мэдэж чаддаггүй; тэдний дундаас бүр нэг ч хүн Бурханы хүсэлд нийцэж чаддаггүй. Тэд бүгдээрээ үнэ цэнгүй, өөдгүй хүмүүс бөгөөд Бурханд зааж сургахын тулд дор бүрнээ өндөрт зогсдог. Тэд Бурханы нэрээр далайлгадаг атлаа Түүнийг дур зоргоороо эсэргүүцдэг. Бурханд итгэдэг гэх атлаа тэд хүний махыг идэж, цусыг уусаар байдаг. Ийм хүмүүс бүгд хүний сүнсийг залгидаг диаволууд, зөв замд орохоор хичээж буй хүмүүст зориуд саад учруулдаг толгойлогч чөтгөрүүд, мөн Бурханыг эрж хайдаг хүмүүст садаа болдог бул хар чулуу билээ. Тэд ‘эрүүл чийрэг бие махбодтой’ харагдаж болох ч Бурханыг эсэргүүцэхэд хүмүүсийг хөтөлдөг антихристүүдээс цаашгүй гэдгийг дагагчид нь яаж мэдэх юм бэ? Хүний сүнсийг залгидаг амьд диаволууд гэдгийг дагагчид нь яаж мэдэх юм бэ?” (Үг. I Боть: Бурханы илрэлт ба ажил. Бурханыг мэддэггүй бүх хүн бол Бурханыг эсэргүүцдэг хүмүүс юм). Бурханы үгийг уншиж дууссаныхаа дараа би тэр даруй ойлгов. Энэ тахилчид, чуулганы удирдагч нар Өөрийн үгээр Бурханы илчилсэн шашны антихристүүд яг мөн болж таарлаа. Хэдийгээр тэд Эзэнд итгэдэг боловч үнэнийг огтхон ч эрэлхийлдэггүй, Бурханаас эмээх зүрх сэтгэл ч байдаггүй байв. Тэд Бурханы эцсийн өдрүүдийн ажлыг өөрсдөө судлаагүйгээр барахгүй, бас Бурханыг доромжилж, Бурханы шинэ ажлыг яллаж, ээжийг минь мэхлэхийн тулд цуу яриа зохиосон ба ингэснээр ээж намайг цохиж, загнаж, гэрийн хорионд байлгах байлаа. Тэгээд тэд намайг дарамталж, хуурч, мэхэлж, сүрдүүлэхийн тулд манайд ахин дахин ирсэн юм. Аз болоход, Бурханы үг намайг залж чиглүүлж, хөтөлж байсан болохоор би тэдний явуулгад автсангүй, Бурханаас ч урвасангүй. Фарисайчууд ч бас жирийн иудейчүүд Эзэн Есүсийн сайн мэдээг хүлээн авахад саад учруулахын тулд төрөл бүрийн жигшүүрт арга хэрэглэж байсан. Тэд хүмүүсийг мэхлэхийн тулд худал яриа хүртэл ашиглан, Эзэн Есүсийн ажил Хуучин Гэрээнээс хальж гарсан бөгөөд Есүс бол эргэн ирсэн Мессиа биш гэж хэлж байв. Энэ нь жирийн иудейчүүдийг фарисайчуудтай нийлж, нүгэлгүй Эзэн Есүсийг цовдлоход хүргэсэн юм. Эзэн Есүс тэднийг зэмлэн: “Хоёр нүүрт хуулийн багш нар, фарисайчууд та нар золгүй еэ! Яагаад гэвэл та нар хүмүүсээс тэнгэрийн хаанчлалыг хааж, өөрсдөө орохгүй бөгөөд орж буй хүмүүсийг ч оруулахгүй” (Maтай 23:13) гэж хэлсэн. Би фарисайчуудын хийсэн зүйлийг тахилчид, чуулганы удирдагчид, гэлэнмаа нарын үйлдэлтэй харьцуулаад, фарисайчуудын мөн чанарыг хэрхэн ялгах тухай ах, эгч нарын урьдын нөхөрлөлийг бодлоо. Тэгээд тахилч, чуулганы удирдагч нар үндсэндээ өнгөрсөн үеийн фарисайчуудаас өөрцгүй болохыг тов тодорхой харав. Өөрсдийн байр суурь, амин зуулгыг хамгаалахын тулд тэд Төгс Хүчит Бурханд итгэхэд минь саад хийхээр боломжит бүх аргыг ашиглаж байлаа. Төгс Хүчит Бурханы эцсийн өдрүүдийн ажлыг би ээж болон бүх гэр бүлийнхэндээ номлож, гэр бүлийнхэн маань Төгс Хүчит Бурханд итгэж эхэлнэ хэмээн тэд айж байжээ. Энэ нь тэдний хонин сүргийн хэмжээг цөөрүүлж, сар бүр авдаг хандивыг ч багасгах байв. Тэд үнэхээр Бурханы тахилыг хулгайлж, тэнгэрийн хаанчлалд ороход нь хүмүүст саад учруулдаг муу зарц нар, антихристүүд юм! Тэдний антихрист мөн чанарыг тодорхой хармагцаа би энэ хүмүүстэй хэрхэн харьцахаа мэдлээ. Тэд Бурханд итгэдэг ч Бурханыг эсэргүүцдэг, Бурханы дайснууд байсан бөгөөд тийм болохоор би тэднийг орхих ёстойгоо мэдэж байсан юм. Хэдийгээр саяын хэдэн өдөр тэд надад төвөг удсаны улмаас би зовж шаналсан ч Бурханы үгийн удирдамж, гэгээрэл надад байв. Бурханы сөрөг товойлгогч болсноороо тэд намайг ялган таних чадвартай болгосон бөгөөд Бурханы үгтэй холбоотой зарим бодит туршлагатай болох боломж олгосон. Би Бурханы үг бол үнэн, зам, амь болохыг биечлэн мэдэрч, Төгс Хүчит Бурхан бол жинхэнэ Бурхан гэдэгт улам их итгэх болов. Би зүрх сэтгэлдээ туйлын их баяр хөөр, амар тайвныг мэдэрч, чимээгүйхэн сэтгэл шулуудлаа: Сатан яаж ч үймүүлэхээр оролдсон бай, би Бурханаас хэзээ ч урвахгүй. Бурханы төлөө гэрчлэлд зогсон, диавол Сатаныг шившиглэхээр шийдсэн!

Амар тайван өнгөрүүлсэн хоёрхон өдрийн дараа Сатаны дарамт, шахалттай дахин нэг удаа тулгарна гэж би хэзээ ч төсөөлж байсангүй. Нэг шөнө ээж, хэдэн нагац ах эгч нар, бас ээжийн нагац эгч Төгс Хүчит Бурханд итгэхэд минь саад хийх гэж ирлээ. Бүгдээрээ цугласныг нь хараад би маш их уурлав. “Би ердөө л жинхэнэ Бурханд итгэдэг. Юу ч нь буруу байгаа юм бэ? Тэд яагаад энэ талаар дахин дахин хөөцөлдөөд байгаа юм бэ?” гэж бодогдов. Энэ үед ээжийн нагац эгч нэг л жигтэйгээр “Алив, Шиаоёу. Эмээгийнд чинь очъё” гэж хэлэв. Ээжийн нагац эгчийн ингэж хэлэхийг сонсоод би гайхан, ингэж бодлоо: “Тэд намайг ээжийнх рүү авч явах гэж иржээ. Тэгээд намайг сэтгэцийн асуудалтай эмээтэй минь хамт түгжихийг хүсэж байна! Миний хамаатнууд надад яаж ийм юм хийж чадаж байна аа? Тэд яахаараа ийм цэвдэг байж чаддаг байна аа!” Яг ингэж бодож байтал ээж маань олс шүүрэн авч, над руу яаран хүрч ирээд, явган сууж, хөлийг маань холбон уяж эхлэв. Би маш их түгшлээ. Тэгээд ээжийн гарыг түлхэн: “Та юу хийж байгаа юм бэ? Яагаад намайг хүлэх гээд байгаа юм?” гэж хашгирлаа. Үүнийг хараад хоёр нагац ах хүрч ирээд, хоёр мөрөн дээр маань дарж, намайг эсэргүүцэл үзүүлэх аргагүй болгов. Тэр үед би буйдан дээр сууж байсан бөгөөд босож чадахгүй байлаа. Би зүрх сэтгэлдээ Бурханыг яаран дуудлаа: “Өө Бурхан минь! Тэд намайг хүлээд, авч явахаар оролдож байна. Хэрвээ тэд амжилтад хүрвэл би Танд итгэх боломжгүй болно, бас чуулганыг олж чадахгүй болно. Өө Бурхан минь! Надад итгэл, хүч чадал, гарах гарц өгөөч!” Залбирч дуусаад биед маань хүч чадал бялхахыг мэдрэв. Би тэгээд: “Та нар яах гээд байгаа юм? Намайг тавиач!” гэж хашгиран тэмцэв. Ямар их эсэргүүцэж байгааг минь хараад тэд намайг суллалаа. Би Бурханд маш их талархаж байв. Хүн Бурханд чин сэтгэлээсээ найдаж байгаа цагт Бурханы үйл хэргийг харна гэдгийг би үнэхээр мэдэрсэн юм. Бас Бурхан миний хажууд байж, цаг ямагт намайг харж, хамгаалж байдгийг үнэхээр мэдэрсэн билээ. “Энэ орчин нөхцөлд би үнэн зүрх сэтгэлээ Бурханд өргөн барих ёстой, бас диавол Сатаныг бүхэлд нь шившиглэх ёстой” гэж би бодлоо. Тэгээд би тэдэнд: “Бусад зүйлийн тухайд бол би та нарыг сонсоно. Гэхдээ Бурханд итгэх тухайд бол зөвхөн Бурханыг л сонсоно! Төгс Хүчит Бурхан бол эргэн ирсэн Эзэн Есүс гэдэгт би аль хэдийн хатуу итгэсэн. Та нар намайг яаж ч хүчилсэн бай, би гуйвж дайвахгүй!” хэмээн тууштай хэлэв. Бурханыг дагахаар нэгэнт шийдмэгцээ би Бурханы үйл хэргийг дахин харлаа. Нагац эгч нарын нэг нь: “Түүнийг битгий хүл. Ингээд ямар ч нэмэргүй. Тэр баттай итгэснийг би харж байна” гэлээ. Нагац эгчийг тэгж хэлэхэд л тэд цөхөрсөн байдатай явцгаав. Тэднийг явсан даруй би хазганан, бие бялдар, сэтгэл санааны хувьд маш их ядарснаа мэдэрлээ. Надад өчүүхэн төдий ч хүч чадал үлдээгүй байв. Би орон дээрээ хэвтэж, нойронд умбасан юм. Дараа өглөө нь урьд шөнө болсон зүйлийн талаар бодоход сэтгэл санаа нэлээд хүнд байлаа. Хамаатнуудын надад хандаж байсан хандлагыг эргэн санаад ингэж бодохгүй байж би чадаагүй юм: “Ээ, халаг! Миний ээж болон хамаатнууд маань тахилчид, чуулганы удирдагчдын тараасан цуу ярианд хууртаад, намайг албадан шахах гэж үргэлжлүүлэн оролдсоор байна. Энэ бүхэн хэзээ дуусах юм бэ?” Тэгээд би Төгс Хүчит Бурханы Чуулганы ах, эгч нартай хамт байсан үеэ санав. Бид хамтдаа үнэнийг эрэлхийлж, үүргээ биелүүлж, бие биедээ тусалж, дэмжиж байлаа. Хэн ч, хэнийг ч дээрэлхэхээр оролдож байгаагүй бөгөөд сэрэмжлэх шаардлагагүй байсан юм. Надад маш эрх чөлөөтэй, чөлөөлөгдсөн санагдаж, өдөр бүр сэтгэл хангалуун, амар тайван байдаг байжээ. Гэтэл одоо би гэртээ хоригдож, ямар ч эрх чөлөөгүйгээр, өдөр бүр сэтгэл түгшин амьдарч байв. Хамаатнууд юм уу хуучин чуулганы хүмүүс хэдийд ирэхийг би огт мэдэхгүй байлаа. Сайндаа л тэд намайг хөнгөхөн зэмлэж, хамгийн муудаа л, заналхийлж, айлган сүрдүүлэхээр оролддог байсан юм. Би маш их шаналж, аз жаргалгүй байлаа. Бас Төгс Хүчит Бурханы Чуулган руу буцан очиж, цуглаанд оролцож, ах эгч нартайгаа хамт магтан дуу дуулж, Бурханыг магтахыг үнэхээр хүсэж байсан юм.

Энэ явдлын дараа тун удалгүй бүр ч төсөөлөөгүй нэг зүйл болов. Нэг өдөр нөхөр бид хоёр юм худалдан авахаар гадагш гарлаа. Гэртээ эргэж ирээд би MP5 тоглуулагч дээрх Бурханы үгийг уншихыг хүссэн боловч олж чадсангүй. Миний сэтгэл ихэд түгшин, өрөөн дотуур нааш цааш холхин, “МР5 тоглуулагч маань хааччихав аа? Би гарцаагүй гэртээ орхисон шүү дээ. Яагаад олж чадахгүй байна аа?” гэж бодов. Ээж маань аваад явсан байж таарна гэж гэнэт бодогдлоо. Нэг өдөр ээж өрөөнд минь орж ирээд, МР5 тоглуулагч дээрээ Бурханы үгийг сонсож байгааг минь харсан гэдгийг би саналаа. Дараа нь ээж үе үе манай гэрт ирж, юмыг маань онгичдог байв. МР5 тоглуулагч маань олдохгүй байгаагийн шалтгаан нь ээж түүнийг авсных гэдэгт би итгэлтэй байв. Энэ тухай бодоод миний уур хүрч, ээжийнхээ гэр рүү бөөн уур болж очив. Хаалгаар орох үедээ би ээж нагац эгчтэй ярьж байгааг харлаа. Би ээж рүү очиж: “Ээж ээ, та миний МР5 тоглуулагчийг авсан уу? Тэр чинь минийх. Хэрвээ та авсан бол яг одоо буцаагаад өг” гэж хэлэв. Гайхалтай нь, ээж маань үүнийг авснаа эрс үгүйсгэлээ. Ээжийн ихэмсэг харцыг хараад би ууртайгаар: “Би МР5 тоглуулагчаа гэртээ байлгадаг. Өөр хүн үүнд хүрсэн байх ёсгүй. Та л миний юмсыг байнга онгичиж байдаг. Та авсан нь тодорхой. Надад буцаагаад өг!” гэлээ. Намайг ингэж байцаахад ээж маань ширүүн дуугаар: “Би тэрийг чамд буцааж өгөхгүй. Чи тэрийг надаас хэзээ ч буцаан авахгүй тул гэртээ харьсан чинь дээр!” гэж хэлэв. Тэгээд намайг хэчнээн их шаардсан ч бай, надад өгөх шинжгүй байсан тул би гар хоосон харихаас өөр аргагүй болсон юм. Гэртээ харих замд надад үнэхээр таагүй санагдаж байлаа. “Би МР5 тоглуулагчгүй боллоо. Цаашид Бурханы үгийг уншиж чадахгүй нь. Урьд нь ээж болон бусад хүмүүс намайг дарамтлахаар ирдэг байсан хэдий ч би Бурханы үгийг уншиж, Бурханы үгийн удирдамж, удирдлагыг авч чаддаг байсан. Үр дүнд нь би Бурханы хүслийг ойлгож, итгэлтэй байж, тэдний дайралтыг тэвчих хүч чадалтай байж чадсан. Одоо МР5 тоглуулагч маань алга болчихлоо. Би яах вэ? Бурханы үг байхгүй болохоор би ингээд дуусаж байгаа биш үү?” гэж би бодов. Ингэж бодох тусам төдий чинээ найдваргүй санагдаж, сүнс маань сөрөг боллоо. Надад туйлын өрөвдөлтэй санагдаж байв. Хамгийн сул дорой болж, хамгийн их сэтгэлээр унах мөчид Бурханы үгийн магтан дуу санаанд орлоо: “Өнөөдөр ихэнх хүмүүст тийм мэдлэг байдаггүй. Тэд зовлон үнэ цэнгүй, дэлхий ертөнц өөрсдийг нь хаясан, ар гэрийнх нь амьдрал төвөгтэй, өөрсдийг нь Бурхан хайрладаггүй, хэтийн ирээдүй нь бүрхэг гэж итгэдэг. Зарим хүний зовлон тодорхой нэг цэгт хүрэхэд тэдний бодол үхэл рүү ханддаг. Энэ бол Бурханыг гэх жинхэнэ хайр биш; тийм хүмүүс бол хулчгарууд, тэд ямар ч хатуужилгүй, сул дорой, хүчин мөхөс!… Тиймээс эцсийн энэ өдрүүдэд та нар Бурханд гэрчлэл хийх ёстой. Зовлон чинь хэчнээн их байх нь хамаагүй, та нар бүр эцсийг нь хүртэл алхах ёстой, эцсийн амьсгалаа авч байхдаа ч Бурханд үнэнч байж, Бурханы зохицуулалтад захирагдсаар байх ёстой; энэ нь л Бурханыг үнэхээр хайрлаж байгаа хэрэг бөгөөд энэ нь л хүчтэй, цангинасан гэрчлэл юм” (Хургыг дагаж шинэ дуу дуулъя номын “Зовлон чинь хэчнээн их байсан ч Бурханыг хайрлахаар эрж хай”). Энэ нөхцөл байдалд Өөрт нь гэрчлэл хийж чадна гэж Бурхан надад найдаж байсныг би Бурханы үгийн удирдамж дор ойлгосон билээ. Юмс хэчнээн хүнд хэцүү болсон ч бай, би эцсээ хүртэл Бурханд үнэнч байж, Бурханд итгэх итгэлээ алдахгүй байх ёстой байжээ. Би өөрийн туулсан бүх хяхалт хавчлагыг бодоод, хэрэг явдал бүр сүнсний ертөнц дэх тулаан байсныг ухаарсан юм. Намайг бага багаар сүйрүүлэхийн тулд Сатан бүхий л төрлийн арга барил ашиглаж байлаа. Яг одоо тэр сүнсийг минь залгихыг хүссэндээ миний “сүнслэг амийн тэжээл”-ийг маань булаагаад авчихлаа. Сатан үнэхээр харгис хэрцгий юм. Би зальт арга мэхэнд нь автах ёсгүй. Хэдийгээр MP5 тоглуулагч маань байхгүй болсон хэдий ч надад Бурхан байсаар байв. Бурхан намайг мөн л гэгээрүүлж, залж чиглүүлсээр байх байсан бөгөөд хором бүрд Бурханд найдаж байгаа цагт хүндрэл бэрхшээл бүрийг даван туулахад Бурхан надад тусална гэдэгт би итгэж байлаа. Ирээдүйд би ямар ч нөхцөлтэй нүүр тулгарсан бай, биед маань эцсийн ганц амьсгал үлдсэн цагт би Бурханы төлөө гэрчлэлд зогсоно. Бурханы үг дахин нэг удаа намайг чиглүүлж, цааш явахад хэрэгтэй итгэлийг надад өгсөн юм.

Энэхүү хавчлага, саад бэрхшээлийг ахин дахин туулснаар дамжуулан би Бурханы үгийн хүч чадал, эрх мэдлийг харсан билээ. Намайг сөрөг, сул дорой болж, будилж, самгардах бүрд Бурханы үг надад хэрэгтэй итгэл, хүч чадлыг өгч, Сатаны заль мэхийг нэвт харан, Бурханы төлөө гэрчлэлд зогсоход намайг залж чиглүүлж байв. Үүний зэрэгцээ, Бурхан хором бүрд миний хажууд байж, миний түшиг тулгуур болж, надад замыг нээж өгч байсныг би бас харж чадсан билээ. Бурханд итгэх итгэл минь бага багаар нэмэгдэж, гэр бүлийнхнээ орхиж явах хүсэл улам бүр хүчтэй болж байв. Би энэхүү “барын үүр”-ээс аль болох хурдан зугтаж, чуулган болон ах эгч нараа олж авах ёстой гэдгээ мэдэж байлаа. Тиймээс би Бурханд залбирч, энэ асуудлыг Түүнд даатгасан бөгөөд намайг залж чиглүүлэхийг Бурханаас гуйсан юм. Хэдэн өдрийн дараа би дүүгийнхээ ажиглалтаас бултаж, гэрээсээ амжилттай оргон зайлав. Би чуулганы амьдралаар амьдарч, чадлынхаа хэрээр үүргээ биелүүлэхийн тулд Төгс Хүчит Бурханы Чуулган руу буцаж очсон билээ. Нэг сар гаруйн шаналал зовлон тэгэхэд л эцэстээ дуусаж, миний зүрх сэтгэл дэх дарамт, санаа зовнилын мэдрэмж агаарт замхрах утаа адил сарнив. Сатаны харанхуй нөлөөг эвдэн гарч, “барын үүр”-ээс оргон зайлахад намайг залж чиглүүлэн, дахин нэг удаа Бурханы гэр бүл рүү замчилсных нь төлөө Бурханд талархъя.

Энэ хугацаанд би Бурханы хайр, авралыг тодорхой харж, Бурхан цаг ямагт намайг хамгаалан миний хажууд байж, Сатанд мэхлэгдэх, залгигдахаас намайг сэргийлж байсныг харсан учраас энэхүү туршлага оюун санаанд минь шинэ сэргэг хэвээр үлджээ. Үүний зэрэгцээ энэ ер бусын туршлага надад тахилч, чуулганы удирдагч нар болон бусад хүмүүсийг ялган таних чадвартай болгосон юм. Тэд Төгс Хүчит Бурханыг улайран яллаж, доромжлон, намайг мэхлэхийн тулд цуу яриа зохиож, худал гэрчлэл хийсэн. Мөн Төгс Хүчит Бурханыг дагахыг минь болиулахаар оролдон төрөл бүрийн арга заль ашигласан. Тэд бол Бурханы эцсийн өдрүүдийн ажлыг хүлээн зөвшөөрч, Бурханы авралыг хүлээн авч, Бурханаар авхуулахад саад болдог бул хар чулуу, түүнчлэн хүмүүсийн сүнсийг залгихын тулд энд байгаа сатаны чөтгөрүүд! Энэ үед л би Төгс Хүчит Бурханы хэлсэн дараах үгийн жинхэнэ утга учрыг эцэст нь ойлгосон билээ: “Итгэгчид, үл итгэгчид нь хоорондоо таарамжгүй; харин ч нэг нэгнийхээ эсрэг байдаг” (Үг. I Боть: Бурханы илрэлт ба ажил. Бурхан хүн хоёр амралтад хамт орох болно). Хэдийгээр тахилчид, чуулганы удирдагчид, гэлэнмаа нар, хуучин сүмийн гишүүд болон миний ээж гаднаа Бурханд итгэдэг мэт харагддаг боловч Бурханы дуу хоолойг ойлгодоггүй, Бурханыг мэддэггүй болохыг би ухаарсан юм. Тэд эргэн ирсэн Эзэний ажлыг хүлээн авахаас татгалздаг тул Бурхан тэдний итгэлийг хүлээн зөвшөөрдөггүй. Бурханы нүдээр бол тэд үл итгэгчид. Тэд бол эцсийн өдрүүд дэх Бурханы ажлаар илчлэгдсэн үрийн сүүлнүүд бөгөөд мөн чанартаа Бурханыг эсэргүүцдэг чөтгөрүүд, антихристүүд юм. Түүнчлэн, гэр бүлийн гишүүдийн хавчлага болон шашны хүмүүсийн саад бэрхшээл нь бүгд Сатанаас үүдэлтэй дайралтууд, мөн сүнсний ертөнцөд явагдаж буй ширүүн тулаан юм гэдгийг би бас харав. Надад саад бэрхшээл учруулан, үнэн замыг хөсөр хаяж, Бурханаас урваж, өөрийнх нь “тэвэр”-т орж, Бурханаар авруулах боломжоо алдаж, түүнтэй хамт тамд сүйрэхэд намайг хүргэхийн тулд Сатан энэ хүмүүс, үйл явдал, зүйлсийг ашиглахыг хүсжээ. Гэхдээ Бурханы мэргэн ухаан Сатаны явуулгад суурилан хэрэгждэг. Сатан над руу дайрч, саад бэрхшээл учруулах болгонд Бурхан намайг хором бүрд удирдаж, залж чиглүүлсэн ба ингэснээр би Бурханы үгийг туулж, Түүний үгээр дамжуулан ялган таних чадвар, гүн ухаантай болж чадах байв. Бурхан бас Түүнд итгэх итгэлийг минь төгс болгож, Бурханд итгэх миний итгэлийг жинхэнэ, тууштай болгож, сул дорой байхыг нь болиулсан юм. Намайг залж чиглүүлэн, сар гаруйхны хугацаанд зарим үнэнийг ойлгоход минь тусалсан Бурханд талархаж байна. Одоо би сайн муу, сайхан муухайн ялгааг мэднэ. Бурханд итгэх итгэл минь улам бэхжиж, би Бурханд илүү ойр болсон. Зовлон шаналал бол үнэхээр Бурханы ерөөл юм! Ирээдүйн итгэлийн амьдралдаа би Бурханы ажлыг бүр их туулахыг хүсэж байгаа бөгөөд эцсээ хүртэл Төгс Хүчит Бурханыг дагахад бэлэн байна!