Үг нь махбодоор илэрсэн

Агуулга

Дөчин хоёр дахь айлдвар

Шинэ ажил эхэлмэгц бүх хүмүүс шинэ оролттой байх ба тэд Надтай хамт гар гараасаа хөтлөлцөн урагшлан ахих болно, бид хаанчлалын агуу замаар алхаж, хүн бид хоёрын хооронд асар дотно байдал байдаг. Өөрийнхөө мэдрэмжийг харуулахын тулд, хүнд хандах Өөрийнхөө хандлагыг үзүүлэхийн тулд Би үргэлж хүнтэй ярьсан. Гэхдээ эдгээр үгний нэг хэсэг нь хүмүүсийг шархлуулж магадгүй байхад зарим нь тэдэнд асар их ач тустай байж болох юм, иймээс Миний амнаас гарч байгаа зүйлийг илүү анхааралтай сонсохыг Би хүмүүст зөвлөдөг. Миний айлдварууд гоёмсог агаад сайтар боловсруулсан биш байж болох боловч тэдгээр нь бүгд Миний зүрх сэтгэлийн гүнээс гарсан үгс юм. Хүн анхнаасаа Миний найз нөхөр байсан учраас Би Өөрийн ажлыг хүмүүсийн дунд үргэлжлүүлэн гүйцэтгэсэн ба хүн ч гэсэн Миний ажлыг тасалдуулахаас гүнээ айж, Надтай хамтран ажиллахын тулд чадах бүхнээ хийдэг. Энэ мөчид Миний зүрх сэтгэл асар их баяр хөөрөөр дүүрэн байна, учир нь Би хэсэг хүмүүсийг олж авсан бөгөөд иймээс Миний “бизнес” уналтанд байхаа больж, хий хоосон үгс байхаа больж, Миний “франчайзын зах зээл” муухан ажиллахаа болино. Эцсийн эцэст хүмүүс мэдрэмжтэй бөгөөд тэд бүгд Миний нэрийн төлөө, Миний алдрын төлөө “өөрсдийгөө зориулахад” бэлэн байгаа, ийм маягаар Миний “франчайзын хэлтэс” зарим нэг шинэ “бараа” олж авч, сүнсний ертөнц дэх олон “үйлчлүүлэгчид” Миний “барааг” худалдан авахаар ирдэг. Зөвхөн энэ мөчид л Би алдрыг олж авдаг, зөвхөн тэр үед л Миний амаар хэлэгдсэн үгс хий хоосон үгс байхаа больдог. Би ялгуусан байсан бөгөөд ялалттайгаар эргэн ирж, бүх хүмүүс Намайг магтан алдаршуулдаг. Намайг гэсэн бахдал бишрэлээ харуулж, Миний хөлийн дор бууж өгсөн гэдгээ харуулахын тулд энэ мөчид агуу улаан луу ч гэсэн “алдаршуулахаар” ирдэг ба Би үүгээр алдаршдаг. Бүтээлийн цаг үеэс эхлээд өнөөдрийг хүртэл Би олон ялгуусан тулаанд тулалдсан бөгөөд олон бахадмаар зүйл хийсэн. Олон хүмүүс нэгэнтээ Намайг магтан дуулж, Надад магтаал өргөж, Миний төлөө бүжиглэсэн. Хэдий эдгээр нь сэтгэл хөдлөм дүр зураг агаад мартагдашгүй байсан боловч Би хэзээ ч Өөрийн инээмсэглэлийг харуулаагүй, учир нь Би хүнийг хараахан байлдан дагуулаагүй, харин ердөө орчлон ертөнцийг бүтээсэнтэй адил төстэй ажлын нэг хэсгийг л хийж байгаа билээ. Өнөөдөр бол өнгөрсөн үетэй адилгүй. Би сэнтий дээрээс инээмсэглэдэг ба Би хүнийг байлдан дагуулж, хүмүүс бүгдээрээ Намайг шүтэн мөргөж, мэхийн ёсолдог. Өнөөдрийн хүмүүс бол өнгөрсөн үеийнх шиг биш. Хэзээ Миний ажил өнөө үеийн төлөө байдаггүй байсан юм бэ? Хэзээ энэ нь Миний алдрын төлөө байдаггүй байсан юм бэ? Илүү гэгээлэг маргаашийн төлөө Би хүнд Өөрийн бүх ажлыг олон дахин ил тод болгох болно, ингэснээр Миний бүхий л алдар бүтээгдсэн хүнд “үлдэх” юм. Би үүнийг Өөрийн ажлын зарчим гэж үзэх болно. Надтай хамтран ажиллахад бэлэн байгаа хүмүүс өндийн босч, шаргуу ажилла, ингэснээр Миний алдрын ихээхэн нь огторгуйг дүүргэж болох юм. Одоо үе бол авьяас чадвараа дээд зэргээр ашиглах цаг. Миний хайрын халамж, хамгаалалтан дор байгаа бүхэнд энд Миний өмнөөс авьяас чадвараа хэрэглэх боломж байгаа бөгөөд Өөрийнхөө ажлын төлөө “эргүүлэхийн” тулд Би бүх зүйлийг залах болно. Тэнгэрт нисэж буй шувууд бол тэнгэр дэх Миний алдар, газар дээрх далай тэнгис бол газар дээрх Миний үйлс, бүх зүйлийн эзэн бол бүх зүйлийн дундах Миний илрэл бөгөөд Би газар дээр байгаа бүхнийг Өөрийн удирдлагын хөрөнгө болгон хэрэглэж, бүх зүйлийг үржин олширч, цэцэглэн хөгжиж, амиар дүүрэхэд хүргэдэг.

Газар дээрх Миний ажил эцсийн үе шатанд бүрэн төгсөх болно гэж Би бүтээлийн цаг үед аль хэдийн шийдсэн. Миний ажил дуусах үе нь Миний бүх үйлс огторгуйд илэрхий болох яг тэр үе байх болно. Би газар дээрх хүмүүсээр Өөрийн үйлсийг хүлээн зөвшөөрүүлж, “шүүлтийн сэнтийн” өмнө Миний үйл хэргүүд нотлогдох болно, ингэснээр газар дэлхий даяар буулт хийх хүмүүсийн дунд тэдгээр нь хүлээн зөвшөөрөгдөх юм. Тиймээс дараа нь Би өнгөрсөн эрин үеүдэд хэзээ ч хийгдэж байгаагүй төслийг эхлүүлэх болно. Өнөөдрөөс эхлээд Би Өөрийн үйл хэргийг алхам алхмаар ил болгоно, ингэснээр Миний мэргэн ухаан, Миний гайхалтай байдал болон Миний ойлгогдошгүй байдал нийгмийн бүхий л хүрээнд хүлээн зөвшөөрөгдөж, нотлогдох юм. Ялангуяа газар дээрх бүх эрх баригч намуудын өмнө Миний үйл хэрэг бүр ч илүүгээр хүлээн зөвшөөрөгдөж, тэгснээр Миний үйлс “шүүгчдээр” шүүгдэж, “хуульчдаар” “өмгөөлүүлнэ” тэгээд Миний үйлс хүлээн зөвшөөрөгдөж, бүх хүмүүсийг толгой гудайн, буулт хийхэд хүргэх болно. Энэ цаг мөчөөс эхлээд Миний үйлдлүүд нийгмийн бүх хүрээнд хүлээн зөвшөөрөгдөх ба энэ нь Би газар дээр бүх алдрыг олж авах мөч байх болно. Тийм цаг үед Би хүнд илрэн харагдах бөгөөд цаашид нуугдахгүй. Одоохондоо Миний үйл хэрэг хараахан оргилдоо хүрээгүй байгаа. Миний ажил урагш ахисаар байгаа бөгөөд дээд цэгтээ хүрэх үедээ энэ нь дуусах болно. Би бүх улс үндэстний хүмүүсийг бүрэн байлдан дагуулж, хэрцгий догшин араатнуудыг Би Өөрийнхөө өмнө хурга шиг номхон болгож, газар дээрх хүмүүсийн адилаар агуу улаан лууг Миний өмнө захирагдахад хүргэнэ. Би тэнгэр дэх бүх дайснуудаа ялан дийлж, газар дээрх бүх өрсөлдөгчдөө ч байлдан дагуулагдахад хүргэнэ. Энэ бол Миний төлөвлөгөө бөгөөд Миний үйл хэргийн гайхалтай байдал юм. Хүн зөвхөн Миний удирдамжин доорх байгалийн нөлөөн дор л амьдарч чадна – тэр өөрөө шийдвэр гаргаж чадахгүй! Хэн Миний мутраас зугтаж чадах юм бэ? Би бүхий л байгалийг ангилж, хуулийн дотор оршин тогтнуулсан бөгөөд зөвхөн үүний улмаас л газар дээр хаврын урь, намрын сэрүү гэх мэтийн хуулиуд байдаг. Газар дээрх цэцэгнүүд өвөл хагдарч, зун цэцэглэдэгийн шалтгаан нь Миний мутрын гайхалтай байдлаас болдог, галуун сүрэг өвөлдөө өмнө зүгт нисдэгийн шалтгаан нь Би халуун хүйтнийг тохируулдгаас болдог бөгөөд далай давалгаалдгийн шалтгаан нь Би газрын гадарга дээрх зүйлсийг усанд автуулахыг хүсдэгээс болдог. Надаар зохицуулагддаггүй юу байна вэ? Энэ мөчөөс эхлээд хүний “байгалийн эдийн засаг” нь Миний үгэнд бүхэлдээ ялагдаж, хүмүүс “байгалийн хуулийн” оршин тогтнолын улмаас Миний дүр төрхийг үндсээр нь арилгахаа болино. Бүх зүйлийн Захирагчийн оршин тогтнолыг хэн дахин үгүйсгэж зүрхлэх юм бэ? Тэнгэрт Би бол Тэргүүн нь; бүх зүйлийн дунд Би бол Эзэн; бүх хүмүүсийн дунд Би нэгдүгээрх нь. Үүнийг “будгаар” хялбархан халхалж хэн зүрхлэх юм бэ? Үнэний оршин тогтнолыг худал хуурмаг зүйл нурааж чадах уу? Энэхүү үнэ цэнэтэй боломжоор Би Өөрийн гар дахь ажлыг дахин нэгэнтээ эхэлж, цаашид хүний хөндлөнгийн оролцоог амсахгүй, машиныг үргэлжлүүлэн эргүүлнэ.

Би Өөрийнхөө үгэн дунд янз бүрийн “амтлагч” нэмсэн ба тиймээс Би хүний ахлах тогооч нь юм шиг байдаг. Хэдийгээр хүмүүс ямар амтлагчууд нэмснийг мэддэггүй боловч тэд амтанд нь дурладаг; “тавгаа” бариад тэд Миний бэлтгэсэн “хоолнуудыг” бүгдээрээ амталдаг. Яагаад хүмүүс үргэлж Миний биечлэн бэлтгэсэн хоолыг илүү их идэхийг хүсдэгийг Би мэдэхгүй. Тэд Намайг хэтэрхий өндрөөр авч үздэг юм шиг, тэд Намайг бүх амтлагчуудаас хамгийн шилдэг нь гэж харж, бусдыг нь огтхон ч тоодоггүй юм шиг байдаг. Би хэтэрхий их нэрээ боддог учраас Өөрийнхөө хувийн учир шалтгааны улмаас Би бусдын “найдвартай ажлын байрыг” бут ниргэхийг хүсдэггүй. Тиймээс Би боломжийг ашиглан гал тогооноос нэг алхам ухарч, бусад хүмүүст ялгарах боломжийг олгодог. Зөвхөн ийм байдлаар л Миний зүрх сэтгэл тууштай байдаг; Би хүмүүсээр Өөрийгөө хүндлүүлж, бусдыг дорд үзүүлэхийг хүсдэггүй, тэр бол буруу юм. Хүмүүсийн зүрх сэтгэлд зай эзлэхийн үнэ цэнэ юу вэ? Би үнэхээр тийм бүдүүлэг агаад үндэслэлгүй юу? Би үнэхээр байр сууринд суухыг хүсэж байгаа юу? Хэрвээ тийм бол яагаад Би ийм агуу төслийг эхлүүлсэн юм бэ? Би бусдын эсрэг алдар нэр, эд хөрөнгөний төлөө тэмцэхийг хүсдэггүй, Би газар дэлхийн алдар нэр болон эд хөрөнгийг үл тоомсорлодог ба энэ нь Миний эрэлхийлдэг зүйл биш. Би хүнийг үлгэр дуурайл гэж хардаггүй, Би тэмцэлдэж эсвэл дайрч довтолдоггүй харин Би Өөрийн “гар урлалдаа” найдаж амьдралаа залгуулдаг бөгөөд мөс чанаргүй үйл үйлддэггүй. Тиймээс газар дэлхийгээр алхах үедээ Би эхлээд үйлдээд, дараа нь “гар урлалынхаа төлбөрийг” шаарддаг – зөвхөн энэ нь л хүний хэлдэг шударга ёс, зүйтэй байдал юм, үүнд ямар ч хэтрүүлэг байхгүй, үүнийг өчүүхэн төдий ч багасгаагүй бөгөөд Би баримтуудын анхдагч утга учрын дагуу л ярьдаг. Би хүмүүсийн дунд урагш хойш алхаж, шударга агаад боломжийн хүмүүсийг эрж хайдаг ч ямар ч үр нөлөө байгаагүй. Хүмүүс наймаалцах дуртай учраас үнэ хэтэрхий өндөр эсвэл хэтэрхий доогуур байдаг, иймээс Би Өөрийн гар дахь үүргээ биелүүлсээр л байгаа. Өнөөдөр хүн яагаад өөрийн үүргээ мөрддөггүйг, өөрийнх нь биеийн өндөр хэр агуу болохыг тэр яагаад мэддэггүйг Би мэдэхгүй хэвээр л байна. Энэ нь хэдэн грамм уу эсвэл хэдэн лиан[a] уу гэдгийг ч хүмүүс мэддэггүй. Тиймээс тэд Намайг мэхэлсээр байдаг. Миний бүх ажил талаар болсон мэт, Миний үгс аварга том уулан дахь цуурай мэт байдаг бөгөөд Миний үгс болон айлдваруудын үндсийг хэн ч хэзээ ч ухамсарлаагүй. Иймээс Би гурав дахь онч мэргэн үгийг товч илэрхийлэхдээ үүнийг суурь болгон ашигладаг: Хүмүүс Намайг мэддэггүй, учир нь тэд Намайг хардаггүй. Энэ нь, Миний үгийг идчихээд хүмүүс хоолны шингэцийг дэмжихийн тулд эм уудаг ба эмний гаж нөлөө хэтэрхий хүчтэй болохоор тэд ой санамжаа алдаж, Миний үгс мартагдсан зүйл болж, Миний байгаа газар тэдний мартсан булан болдог мэт байдаг бөгөөд үүнээс болж Би санаа алддаг. Би маш их ажил хийсэн ч яагаад үүний баталгаа хүмүүст байдаггүй юм бэ? Би хангалттай хичээл чармайлт гаргаагүй юу? Эсвэл Би хүнд юу хэрэгтэйг ухаараагүй учраас энэ үү? Би энэ талаар юу ч мэдэхээ больсон, Миний цорын ганц сонголт бол бүх хүмүүсийг байлдан дагуулахын тулд Өөрийн захиргааны зарлигийг ашиглах явдал юм. Би хайртай ээж байхаа болиод бүх хүн төрөлхтнийг хатуу эцгийн хувьд удирдах болно!

1992 оны 5 дугаар сарын 15

Тайлбар:

a. “Лиан” гэдэг нь Хятадын жингийн хэмжүүр, нэг лиан нь 50 грамм байдаг.