Хүн цэвэршүүлэлтийг туулж байж л жинхэнэ хайрыг олж авч чадна

Та нар бүгд шалгалт, цэвэршүүлэлт дунд байдаг. Цэвэршүүлэлтийн үеэр Бурханыг хэрхэн хайрлах ёстой вэ? Цэвэршүүлэлт туулснаар хүмүүс Бурханд жинхэнэ магтаал өргөж чаддаг бөгөөд цэвэршүүлэлтийн дунд өөрсдийгөө тун их дутуу дулимаг гэдгийг олж харж чаддаг. Чи хэдий чинээ их цэвэршүүлэгдэнэ, махан биеэс төдий чинээ урваж чаддаг; хүмүүс хэдий чинээ их цэвэршүүлэгдэнэ, Бурханд өгөх хайр нь төдий чинээ их байдаг. Энэ бол та нарын ойлгох ёстой зүйл юм. Яагаад хүмүүс цэвэршүүлэгдэх ёстой вэ? Энэ нь ямар үр дүнд хүрэхээр зорьдог вэ? Хүн дээр хийх Бурханы цэвэршүүлэлтийн ажил ямар ач холбогдолтой вэ? Чи үнэхээр Бурханыг эрж хайдаг бол тодорхой хэмжээнд Түүний цэвэршүүлэлтийг туулсныхаа дараа маш сайн, туйлын шаардлагатай гэдгийг нь мэдэрнэ. Цэвэршүүлэлтийн үеэр хүн Бурханыг хэрхэн хайрлах ёстой вэ? Бурханыг хайрлах шийдэмгий байдлаа ашиглан Бурханы цэвэршүүлэлтийг хүлээн авснаар: Цэвэршүүлэлтийн үеэр дотроо тарчилж, зүрхийг чинь хутгаар сийчиж байгаа мэт байдаг ч Бурханыг хайрладаг зүрх сэтгэлээр чи Бурханыг сэтгэл хангалуун болгохыг хүсдэг бөгөөд махан биеэ анхаарахыг хүсдэггүй. Бурханыг гэх хайрыг хэрэгжүүлнэ гэж үүнийг хэлдэг. Дотроо шархалж, зовлон чинь тодорхой хэмжээнд хүрсэн ч чи Бурханы өмнө очиж, “Бурхан минь! Би Таныг орхиж чадахгүй. Дотор минь харанхуй байгаа ч би Таныг сэтгэл хангалуун болгоход бэлэн байна; Та миний зүрх сэтгэлийг мэднэ, Та Өөрийнхөө хайрыг миний дотор илүү их ажиллуулах болтугай” хэмээн залбирахад бэлэн хэвээр байдаг. Энэ бол цэвэршүүлэлтийн үеийн хэрэгжүүлэлт юм. Хэрвээ чи Бурханыг хайрладаг зүрх сэтгэлийг суурь болгон ашиглавал цэвэршүүлэлт чамайг Бурханд илүү ойртуулж, Бурхантай илүү ойр дотно болгож чадна. Бурханд итгэдэг учраас чи Бурханы өмнө зүрх сэтгэлээ өргөн барих ёстой. Хэрвээ чи зүрх сэтгэлээ Бурханд өргөж, Түүний өмнө дэлгэвэл цэвэршүүлэлтийн үеэр яасан ч Бурханыг үгүйсгэхгүй, Түүнийг орхин явахгүй. Ингэснээр Бурхантай харилцах харилцаа чинь улам ойр дотно, улам хэвийн болж, Бурхантай хийх нөхөрлөл чинь улам ойр ойрхон байх болно. Үргэлж ийм маягаар хэрэгжүүлбэл чи Бурханы гэрэлд илүү их амьдарч, Бурханы үгийн удирдамж дор илүү их амьдарч, зан чанарт чинь бас улам их өөрчлөлт гарч, мэдлэг чинь өдөр өдрөөр нэмэгдэнэ. Бурханы шалгалт гэнэт чамд тулгарах өдөр ирэх үед чи Бурханы талд зогсож чадах төдийгүй Бурханд гэрчлэл хийж чадна. Тэр үед чи Иов болон Петр шиг байна. Чи Бурханд гэрчлэл хийсэн гэдэг нь чи бол Түүнийг үнэхээр хайрладаг хүн, Түүний төлөө баяртайгаар амиа өгөх хүн, Бурханыг гэрчлэгч, Бурханаар хайрлагддаг хүн гэсэн утгатай байх болно. Цэвэршүүлэлт туулсан хайр эмзэг биш, харин хүчтэй байдаг. Бурхан чамайг хэзээ, хэрхэн шалгалт туулуулахаас үл хамааран чи амиа ч үл хайхран Бурханы төлөө бүхнийг дуртайяа хөсөр хаяж, Бурханы төлөө юуг ч баяртайяа тэвчиж чадваас хайр чинь цэвэр ариун, итгэл чинь бодит байдалтай байх болно. Тэгсэн цагт л чи үнэхээр Бурханаар хайрлагдсан нэгэн, үнэхээр Бурханаар төгс болгуулсан нэгэн байх болно.

Хэрвээ хүмүүс Сатаны нөлөөнд орвол тэдний доторх Бурханыг хайрлах хайр нь үгүй болж, урьдын үзэгдэл, хайр, шийдэмгий байдал нь алга болсон байдаг. Хүмүүс Бурханы төлөө зовох учиртай гэж боддог байсан боловч өнөөдөр ингэхийг ичгүүртэй гэж үзэн, ихээхэн гомдол гаргадаг. Энэ бол Сатаны ажил бөгөөд тэд Сатаны эрхшээл дор орсны илрэл юм. Ийм байдалтай тулгарвал чи даруй залбирч, аль болох хурдан үүнийг эргүүлэх ёстой—энэ нь Сатан дайрах үед чамайг хамгаална. Гашуун цэвэршүүлэлтийн үеэр хүн Сатаны нөлөөнд хамгийн амархан ордог. Тэгвэл ийм цэвэршүүлэлтийн үеэр чи Бурханыг хэрхэн хайрлах ёстой вэ? Чи шийдэмгий байдлаа дайчилж, Бурханы өмнө зүрх сэтгэлээ дэлгэж, үлдсэн цаг хугацаагаа Түүнд зориулах ёстой. Бурхан чамайг яаж ч цэвэршүүллээ гэсэн, чи Бурханы санаа зорилгыг хангахын тулд үнэнийг хэрэгжүүлж чаддаг байх ёстой бөгөөд идэвх санаачилгаараа Бурханыг эрж хайж, идэвхтэйгээр эрж хайн нөхөрлөж чаддаг байх ёстой. Ийм үед чи хэдий чинээ идэвхгүй байна, сөрөг болж, ухарч няцахад төдий чинээ амархан байх болно. Чи чиг үүргээ гүйцэтгэх шаардлагатай үед тэрийгээ сайн гүйцэтгэдэггүй хэдий ч чадах бүхнээ хийж, Бурханыг хайрладаг зүрх сэтгэлээрээ л хийдэг; бусад хүмүүс юу хэлэх нь хамаагүй—тэд чамайг сайн хийсэн, муу хийсэн гэх нь хамаагүй, ерөнхийдөө санаа зорилго чинь зөв байдаг бөгөөд чи өөрийгөө зөвтгөдөггүй, учир нь чи Бурханы төлөө үйлдэж байгаа. Бусад хүн чамайг буруугаар ойлгох үед чи Бурханд залбирч, “Бурхан минь! Бусад хүн надад хүлээцтэй хандаж, надад сайн хандаасай гэж би гуйхгүй, намайг ойлгож, сайшаагаасай ч гэж гуйхгүй. Би зүрх сэтгэлээрээ Таныг хайрлаж чаддаг, сэтгэл минь амгалан, мөс чанар минь сэвгүй байгаасай л гэж гуйж байна. Бусад хүн намайг магтаж, өргөмжлөөсэй гэж би гуйхгүй; би зүрх сэтгэлээсээ Таныг сэтгэл хангалуун байлгахыг л эрэлхийлдэг. Би чадах бүхнээ хийж чиг үүргээ гүйцэтгэдэг. Хэдийгээр би тэнэг, муу хэв чанартай, сохор боловч Таныг хайр татам гэдгийг мэднэ, байгаа бүхнээ Танд зориулахад би бэлэн байна” хэмээн хэлж чадна. Чамайг ингэж залбирмагц Бурханыг хайрладаг зүрх сэтгэл чинь гарч ирж, зүрх сэтгэл чинь хавьгүй илүү тайвширна. Бурханыг гэх хайрыг хэрэгжүүлнэ гэдэг энэ юм. Туршлагынхаа явцад чи хоёр удаа бүтэлгүйтэж, нэг удаа амжилтад хүрнэ, эсвэл таван удаа бүтэлгүйтэж, хоёр удаа амжилтад хүрнэ, ийм маягаар туулж мэдрэх үедээ чи бүтэлгүйтлийн дунд л Бурханы хайр татам байдлыг харж, өөрийнхөө дутагдлыг олж мэдэж чадна. Дараа нь чи үүнтэй төстэй нөхцөл байдалтай тулгарах үедээ болгоомжтой байж, алхаагаа хянаж, залбирлаа эрчимжүүлэх ёстой бөгөөд чи аажмаар ийм төрлийн нөхцөл байдлыг даван туулж чадна. Залбирал чинь үр дүнд хүрнэ гэдэг энэ юм. Энэ удаад амжилтад хүрснээ, дотроо сэтгэл хангалуун байгаагаа, залбирмагцаа Бурханыг мэдэрч чадаж байгаагаа, Ариун Сүнсний оршихуй чамайг орхиогүйг харах үедээ л чи Бурхан чам дээр хэрхэн ажилладгийг мэдэх болно. Хэрвээ чи ийм маягаар хэрэгжүүлбэл туршлагаараа дамжуулан замтай болох болно. Хэрвээ чи үнэнийг хэрэгжүүлдэггүй бол Ариун Сүнсний оршихуй чиний дотор байхгүй байх болно. Харин чи аливаа зүйлтэй тулгарах үедээ үнэнийг хэрэгжүүлбэл дотроо шаналах боловч Ариун Сүнс дараа нь чамтай хамт байх бөгөөд чи залбирах үедээ Бурханы оршихуйг мэдэрч, Бурханы үгийг хэрэгжүүлэхдээ хүчтэй байх болно, мөн ах эгч нартайгаа нөхөрлөх үед мөс чанарыг чинь буруутгах юу ч байхгүй, амар амгалан санагдаж, ийм маягаар чи хийсэн зүйлээ ил болгож чадна. Бусад хүн юу хэлэх нь хамаагүй, хэрвээ Бурхантай харилцах харилцаа чинь хэвийн үлдэж, чи бусдад хазаарлагдахгүй, бүх зүйлийг даван гарч чадаж байвал энэ нь Бурханы үгийн хэрэгжүүлэлт чинь үр дүнтэй байсныг илтгэж байна.

Бурхан хүнийг хэдий чинээ цэвэршүүлнэ, хүний зүрх сэтгэл Бурханыг төдий чинээ хайрлаж чадна. Зүрх сэтгэлийнх нь шаналал түүний аминд тустай; энэ нь түүнийг Бурханы өмнө өөрийгөө илүү тайван байлгаж, Бурхантай илүү ойр дотно харилцаатай болж, Бурханы хэмжээлшгүй хайр, үлэмж их авралыг илүү сайн харж чадахад хүргэдэг. Петр олон зуун удаа цэвэршүүлэлт туулж, Иов хэд хэдэн шалгалт туулсан. Бурханаар төгс болгуулахыг хүсэж байвал та нар ч гэсэн олон зуун удаа цэвэршүүлэлт туулах ёстой; та нар энэ үйл явцыг туулж, энэ алхамд түшиглэх ёстой—тэр үед л Бурханы санаа зорилгыг хангаж, Бурханаар төгс болгуулж чадна. Цэвэршүүлэлт бол Бурхан хүнийг төгс болгох хамгийн сайн арга; цэвэршүүлэлт болон гашуун шалгалтаар л дамжуулан хүний зүрх сэтгэлд Бурханыг гэх жинхэнэ хайр бий болж чадна. Зовлонгүйгээр хүнд Бурханыг гэх жинхэнэ хайр байдаггүй; хэрвээ хүн дотроо шалгагдахгүй, жинхэнэ цэвэршүүлэлт амсахгүй бол зүрх сэтгэл нь үргэлж гадуур тэнүүчлэх болно. Тодорхой хэмжээнд цэвэршүүлэгдсэнийхээ дараа чи өөрийнхөө сул талууд болон бэрхшээлийг харах бөгөөд чамд маш их зүйл дутагдаж байгааг, тулгарсан олон бэрхшээлийг даван туулж чадахгүй байгаагаа харна, хэчнээн их тэрсэлснээ харна. Шалгалтын үеэр л хүн өөрийнхөө жинхэнэ байдлыг үнэхээр мэдэж чаддаг; шалгалт хүнийг илүү сайн төгс болгож чаддаг.

Амьдралдаа Петр олон зуун удаа цэвэршүүлэлт туулж, ихээхэн зовлон зүдүүр амссан. Энэхүү цэвэршүүлэлт Бурханыг хайрлах дээдийн дээд хайрынх нь суурь, бүхий л амьдралынх нь хамгийн чухал туршлага болсон юм. Тэр дээдийн дээд хайраар Бурханыг хайрлаж чадсан нь нэг талаараа Бурханыг хайрлая гэсэн шийдвэрээс нь болсон; гэхдээ үүнээс ч илүүтэйгээр түүний туулсан цэвэршүүлэлт болон зовлонгоос болсон юм. Энэ зовлон нь Бурханыг хайрлах замд түүний хөтөч болж, хамгийн дурсамжтай зүйл нь болсон билээ. Хэрвээ хүмүүс Бурханыг хайрлахдаа цэвэршүүлэлтийн шаналлыг амсахгүй бол хайр нь өө сэвээр дүүрэн, өөрийн дураар хайраа сонгодог; иймэрхүү хайр Сатаны санаагаар дүүрэн байдаг бөгөөд Бурханы санаа зорилгыг хангаж огт чаддаггүй. Бурханыг хайрлая гэж шийдэх нь Бурханыг үнэхээр хайрлахтай адилгүй. Сэтгэл дотроо тэд Бурханыг хайрлаж, Бурханыг хангалуун байлгахыг л бодож, бодол санаа нь хүний ямар ч санааг агуулаагүй мэт, бүхэлдээ Бурханы төлөө байдаг мэт боловч бодол санааг нь Бурханы өмнө аваачихад Бурхан сайшааж ерөөдөггүй. Хүмүүс бүх үнэнийг бүрэн ойлгож, бүгдийг нь мэдэж авсан үед ч гэсэн үүнийг Бурханыг хайрлаж буйн шинж, энэ хүмүүс Бурханыг хайрлах бодит байдалтай гэж хэлж болохгүй. Хүмүүс олон үнэнийг ойлголоо ч гэсэн цэвэршүүлэлтийг туулахгүйгээр эдгээр үнэнийг хэрэгжүүлэх чадваргүй байдаг; цэвэршүүлэлтийн үеэр л хүмүүс эдгээр үнэний бодит утга учрыг ойлгож, тэр үед л эдгээрийн дотоод утга учрыг жинхэнээсээ үнэлж чаддаг. Тэр үед дахин оролдох үедээ тэд үнэнийг зүй зохистойгоор, Бурханы санаа зорилгын дагуу хэрэгжүүлж чаддаг; тэр үед хүний санаа бодол нь цөөрч, завхрал нь багасаж, мэдрэмж нь багасдаг; тэр үед л хэрэгжүүлэлт нь Бурханыг хайрлах хайрын жинхэнэ илэрхийлэл байдаг. Зүгээр нэг амаараа хүлээн зөвшөөрч, оюун санаагаараа хүссэнээр Бурханыг хайрлах үнэний үр дүнд хүрдэггүй, мөн тэр үнэнийг зүгээр нэг ойлгосноор ч хүрч чадахгүй. Хүмүүс төлөөс төлж, цэвэршүүлэлтийн үеэр илүү их гашуун зовлон амсах шаардлагатай бөгөөд тэгсэн цагт л хайр нь цэвэр ариун болж, Бурханы санаа зорилгод нийцдэг. Өөрийг нь хайрлахыг хүнээс шаардахдаа Бурхан хүсэл тэмүүлэл юм уу хүслээ ашиглан Өөрийг нь хайрлахыг хүнээс шаарддаггүй; Түүнд үйлчлэхийн тулд үнэнийг ашиглаж, үнэнч байснаар л хүн Түүнийг үнэхээр хайрлаж чадна. Гэвч хүн завхрал дунд амьдардаг учир Бурханд үйлчлэхдээ үнэнч байж, үнэнийг ашиглах чадваргүй байдаг. Хүн нэг бол Бурханыг гэсэн хэтэрхий их оргилсон тэмүүлэлтэй, эсвэл хэтэрхий хүйтэн хөндий, хайхрамжгүй байдаг; нэг бол Бурханыг туйлаас хайрлаж, эсвэл туйлын их үзэн яддаг. Завхрал дунд амьдардаг хүмүүс үргэлж энэ хоёр туйлын хооронд, хүсэл зоригоороо амьдардаг ч өөрсдийнх нь зөв гэдэгт итгэдэг. Хэдийгээр Би үүнийг ахин дахин дурдсан ч хүмүүс үүнийг нухацтайгаар авч үзэж чаддаггүй, ач холбогдлыг нь бүрэн ойлгож чаддаггүй тул өөрийгөө хуурсан итгэл, дур зоргоороо Бурханыг хайрлах хайрын төөрөгдөл дунд амьдардаг. Түүхийн туршид хүн төрөлхтөн хөгжиж, эрин үе өнгөрөхийн хэрээр хүнд тавих Бурханы шаардлага улам өндөрсөж, Өөрт нь үнэмлэхүй хандахыг хүнээс улам бүр шаардах болсон. Гэсэн ч Бурханы талаарх хүний мэдлэг улам бүр тодорхойгүй, хийсвэр болж, Бурханыг хайрлах хайр нь үүнийг даган улам бүр цэвэр ариун бус болсон. Сатан хүнийг улам гүн гүнзгий завхруулсан тул хүний байдал болон хийдэг бүхэн нь Бурханы санаа зорилготой улам их зөрчилддөг. Улам их, улам агуу авралын ажил хийхийг энэ нь Бурханаас шаарддаг. Бурханд тавих хүний шаардлага улам хатуу чанд болж, Бурханыг хайрлах хайр нь улам багассаар байна. Хүмүүс тэрслүү байдалтай, үнэнгүй, хүн чанаргүй амьдралаар амьдардаг; тэд Бурханыг өчүүхэн төдий ч хайрладаггүйгээр үл барам, тэрслүү байдал, эсэргүүцлээр дүүрэн байдаг. Тэд өөрсдийгөө Бурханыг туйлаас хайрлаж, чадлынхаа хэрээр нийцтэй байдаг гэж боддог боловч Бурхан тэгж үздэггүй. Бурханыг гэх хүний хайр хэчнээн бохир болох нь Бурханд тун тодорхой байдаг бөгөөд зусардлаас нь болж хүний талаарх бодлоо хэзээ ч өөрчлөөгүй, үнэнч байдлаас нь үүдэн хүний сайн санааг хэзээ ч хариулаагүй. Хүнээс ялгаатай нь Бурхан ялгаж салгах чадвартай: Хэн Өөрийг нь үнэхээр хайрладаг, хайрладаггүйг Тэр мэддэг бөгөөд хүний түр зуурын хөөрлөөс болж зүрх сэтгэл нь дүрэлзэж, ухаанаа алдалгүй, харин мөн чанар болон зан авирынх нь дагуу хүнд ханддаг. Эцсийн эцэст Бурхан бол Бурхан бөгөөд Тэр Өөрийн гэсэн эрхэм чанар, мэдлэг ухаантай; хүн эцсийн эцэст хүн бөгөөд үнэнтэй зөрчилддөг хүний хайраас болж Бурханы толгой эргэхгүй. Харин эсрэгээрээ, Тэр хүний хийдэг бүхэнд зүй зохистой ханддаг.

Хүний байдал болон Бурханд хандах хүний хандлагатай нүүр тулаад Бурхан шинэ ажил хийж, хүнийг Бурханы талаар мэдлэгтэй, бас Бурханыг дуулгавартай дагадаг, хайрладаг, гэрчлэл хийдэг болгосон. Иймээс хүн Бурханы цэвэршүүлэлт төдийгүй шүүлт, засалтыг туулах ёстой, ингэхгүйгээр хүн Бурханыг хэзээ ч мэдэхгүй бөгөөд Түүнийг үнэхээр хайрлаж, Түүнд гэрчлэл хийж хэзээ ч чадахгүй. Бурхан хүнийг зүгээр л өрөөсгөл үр дүнгийн төлөө бус, харин олон талт үр дүнгийн төлөө цэвэршүүлдэг. Иймээс Бурхан үнэнийг эрж хайх хүсэлтэй хүмүүсийн шийдвэр, хайрыг төгс болгохын тулд тэдэн дээр цэвэршүүлэлтийн ажил хийдэг. Үнэнийг эрж хайхыг хүсдэг, Бурханыг хүсэмжилдэг хүмүүст ийм цэвэршүүлэлтээс илүү утга учиртай, ач тустай зүйл гэж үгүй. Эцсийн эцэст Бурхан бол Бурхан учир Бурханы зан чанарыг хүн ойлгож, ухамсарлахад амар биш. Эцсийн эцэст Бурхан хүнийх шиг зан чанартай байх боломжгүй учраас Түүний зан чанарыг ойлгоно гэдэг хүнд амаргүй байдаг. Хүн төрөлхөөсөө үнэнгүй бөгөөд Сатаны завхруулсан хүмүүсийн хувьд үнэнийг ухамсарлахад амаргүй байдаг; хүнд үнэн, үнэнийг хэрэгжүүлэх шийдэмгий зан байдаггүйн дээр зовж, цэвэршүүлэгдэж, шүүгдэхгүй бол шийдэмгий зан нь хэзээ ч төгс болохгүй. Цэвэршүүлэлт нь бүх хүний хувьд шаналгаатай, хүлээн авахад маш хэцүү байдаг хэдий ч цэвэршүүлэлтийн үеэр Бурхан зөвт зан чанараа хүнд илчилж, хүнд тавих шаардлагаа ил тод болгож, хүнийг улам их гэгээрэл, улам бодит засалтаар хангадаг. Баримт, үнэн хоёрыг харьцуулах замаар хүн өөрийнхөө талаар болон үнэний талаар илүү их мэдлэгтэй болж, Бурханы санаа зорилгыг улам их ойлгож, улмаар Бурханыг илүү жинхэнэ, цэвэр ариунаар хайрлах боломжтой болдог. Цэвэршүүлэлтийн ажил явуулах Бурханы зорилго энэ юм. Хүнд Бурханы хийдэг бүх ажил өөрийн гэсэн зорилго, ач холбогдолтой байдаг; Бурхан утга учиргүй ажил хийдэггүй, хүнд ашиггүй ажил ч хийдэггүй. Цэвэршүүлэлт нь хүмүүсийг Бурханы дэргэдээс зайлуулна гэсэн үг биш, тэднийг тамд устгана гэсэн үг ч биш. Харин цэвэршүүлэлтийн үеэр хүний зан чанар, санаа зорилго, хуучин үзэл бодлыг өөрчилж, Бурханыг гэх хайрыг нь өөрчилж, хүний бүхий л амьдралыг өөрчилнө гэсэн үг юм. Цэвэршүүлэлт бол хүнийг турших бодит туршилт, бодит сургалтын нэг хэлбэр бөгөөд цэвэршүүлэлтийн үеэр л хүний хайр төрөлх чиг үүргээ гүйцэтгэж чадна.

Өмнөх: Петр Есүсийг хэрхэн мэдэж авсан тухай

Дараах: Бурханыг хайрладаг хүмүүс Түүний гэрэлд үүрд амьдарна

Одоо үед гай гамшиг ойр ойрхон тохиолдож, Эзэн эргэн ирэх тухай зөгнөлүүд үндсэндээ биелсэн. Бид Эзэнийг хэрхэн угтан авч болох вэ?

Тохиргоо

  • Текст
  • Загвар

Цулгуй өнгө

Загвар

Үсгийн хэв

Үсгийн хэмжээ

Мөр хоорондын зай

Мөр хоорондын зай

Хуудасны өргөн

Гарчиг

Хайх

  • Энэ текстийг хайх
  • Энэ номоос хайх