I

Эцсийн өдрүүдэд Бурхан хүн төрөлхтнийг бүрэн аврахын тулд үнэнийг илэрхийлдэг. Чи Бурханд итгэх замд орох үедээ бүр анхнаасаа аль хэдийн Бурханаар авруулах боломжтой болсон. Энэ бол агуу ерөөл! Үүнийг орхиж болохгүй. Бурхан эцсийн өдрүүдэд хүмүүсийг аварч, төгс болгох нь туйлын ховор боломж юм. Хүн төрөлхтөн хэдэн мянган үеэрээ амьдарч байсан ч урьд нь хэнд ч ийм боломж байгаагүй. Аврагдах гэдэг нь асар том зүйл; чи энэ боломжийг алдаж болохгүй. Танай үеийнхэн бие махбодтой болсон Бурхантай учирсан; энэ бол ерөөл! Энэхүү ерөөл нь хорвоо ертөнцийн хүмүүст харагдахгүй боловч та нар үүнийг харж, үүнийг эдэлсэн бөгөөд энэ бол Бурханы ерөөл юм.

II

Магадгүй зарим хүн үзэгдлийн талаар сайн ойлгохгүй хэвээр байгаа байх; тэд зарим хоосон сургаалыг л ойлгодог ч жинхэнэ итгэлтэй биш. Бурханд итгэх нь үнэхээр сайн бөгөөд Бурханы үгийг унших нь зүрх сэтгэлийг нь үнэхээр гэрэлтүүлдэг гэж л тэдэнд санагддаг, тиймээс тэд үүнийг амьдралын зөв зам гэж батлан, зүрх сэтгэл нь хүчтэй болдог. Тэд зөвхөн Бурханыг дагаж, үнэнийг эрэлхийлж, үүргээ сайн гүйцэтгэж, ариусгагдаж, аврагдахын тулд л Бурханд итгэдэг; тэд зөвхөн Бурханыг дагах замаар алхдаг. Хүмүүс ийм шийдэмгий байдалтай байх нь сайн—энэ нь тэдэнд аврагдах найдвар байна гэсэн үг юм. Бурханыг ингэж дагаснаар тэд Түүгээр хамгаалагддаг. Ядаж л одоо, энэ амьдралдаа тэд аз жаргалтай байна. Тэд цаашид Сатан, нийгэм, эсвэл хүн төрөлхтөнд ноцтой хорлогдохгүй, Бурханы ноёрхол дор бүрэн дүүрэн, жинхэнээсээ амьдардаг. Энэ бол нэр төрийн хэрэг; энэ насандаа мэдэрч болох аз жаргал юм.

III

Чамайг үнэн, амиар хангаж, чамд аврал хайрлахаас гадна Бурхан бас чамд нэгэн амлалт өгсөн: чи энэ амьдралд зуу дахин ихийг, ирэх ертөнцөд мөнх амийг хүлээн авах болно. Тиймээс, энэ хэрэг явдлыг бүү дутуу үнэл. Үнэнийг олж авч, аврал хүртэхийн тулд чиний төлдөг төлөөс, туулдаг зовлон түр зуурынх юм. Ирээдүйд хүмүүс үнэнийг ойлгож, олж авах үед тэдний эдлэх аз жаргал, баяр баясгалан, ерөөл нь үгээр дүрслэхийн аргагүй байж магадгүй. Өөрөөр хэлбэл, чи үнэнийг ойлгож, олж авсан үедээ л Бурханы амлалтыг хүлээн авахад тэнцэнэ. Бурхан чамд бүх үнэн болон амийн хангалтыг үнэ төлбөргүй өгдөг бөгөөд Бурхан чамайг аварч чадна—энэ бүхэн үнэн боловч эцэст нь үнэн ба амийг олж авч чадах эсэх чинь үнэнийг эрэлхийлэх замыг сонгох эсэхээс чинь хамаарна. Энэ сонголтыг хийх шийдвэр чиний өөрийн гарт байдаг.

“Үг. III Боть: Эцсийн өдрүүдийн Христийн яриа. Бурханд итгэхдээ Бурханы үгийг хэрэгжүүлж, туулах нь хамгийн чухал”-аас